پاکستان کرکٹ بورڈ نے پاکستان سپر لیگ کے معاہدے کی خلاف ورزی کرنے پر زمبابوے کے فاسٹ بالر بلیسنگ مزرابانی پر دو سال کی پابندی عائد کردی ہے۔
پی سی بی کے اعلامیے کے مطابق، مزرابانی کو لیگ کے اگلے دو ایڈیشنز کے لیے نااہل قرار دے دیا گیا ہے اور اس پابندی کا اطلاق فوری طور پر ہوگا۔
پی سی بی کا موقف ہے کہ کھلاڑی نے طے شدہ معاہدے کی شرائط پوری نہیں کیں اور لیگ کے بجائے کسی دوسرے متضاد معاہدے کو ترجیح دی، جو پی ایس ایل کے اصولوں کی سنگین خلاف ورزی ہے۔
اعلامیے میں واضح کیا گیا ہے کہ تحریری معاہدہ ہونے کے بعد اس سے انحراف کرنا کسی صورت قابلِ قبول نہیں کیونکہ ایسی خلاف ورزیوں سے لیگ کے اعتماد اور ساکھ کو نقصان پہنچتا ہے۔
پی سی بی نے پیشہ ورانہ معیار اور معاہدوں کی پاسداری پر زور دیتے ہوئے کہا ہے کہ تمام کھلاڑیوں اور ان کے ایجنٹس کو مقررہ اصولوں کی سختی سے پابندی کرنا ہوگی، بصورتِ دیگر مستقبل میں بھی ایسے سخت اقدامات اٹھائے جائیں گے۔