پاکستان کرکٹ بورڈ نے ٹیسٹ ٹیم کے نئے ہیڈ کوچ کے اعلان میں تاخیر کردی ہے کیونکہ اب تک بنگلا دیش کرکٹ بورڈ کی جانب سے اگلے ماہ ہونے والی دو ٹیسٹ میچوں کی سیریز کی تاریخوں اور مقامات کے حوالے سے حتمی جواب موصول نہیں ہوا ہے۔
باخبر ذرائع کے مطابق بنگلا دیش کرکٹ بورڈ جیسے ہی شیڈول کی تصدیق کرے گا، پی سی بی نئے ہیڈ کوچ کے نام کا باضابطہ اعلان کردے گا۔
ذرائع کا کہنا ہے کہ سابق کپتان سرفراز احمد کو نیا ہیڈ کوچ مقرر کرنے کا فیصلہ پہلے ہی کیا جاچکا ہے جو اس وقت لاہور میں ریڈ بال کرکٹرز کے کیمپ کی نگرانی کررہے ہیں۔ سرفراز احمد قومی سلیکٹر کے ساتھ ساتھ ہیڈ کوچ کی ذمہ داریاں بھی نبھائیں گے۔
سیریز کے حوالے سے فیصلہ کیا گیا ہے کہ شان مسعود ہی ٹیسٹ ٹیم کے کپتان برقرار رہیں گے اور وہ پی ایس ایل کے اختتام پر کیمپ جوائن کریں گے۔ یہ پہلا موقع ہوگا کہ سرفراز احمد اور شان مسعود بطور کوچ اور کپتان ایک ساتھ کام کریں گے۔
آئی سی سی ورلڈ ٹیسٹ چیمپئن شپ کا حصہ یہ سیریز ممکنہ طور پر 8 اور 16 مئی سے شروع ہوگی، جس کے بعد پاکستان کو رواں سال ویسٹ انڈیز اور انگلینڈ کے خلاف بھی ٹیسٹ سیریز کھیلنی ہیں۔ قومی سلیکٹرز پی ایس ایل کے اختتام پر ٹیسٹ اسکواڈ کا اعلان کریں گے۔