پاکستان میں مشرقِ وسطیٰ کی حالیہ جنگی صورتحال کے تناظر میں نان ٹیکس ریونیو، بالخصوص پیٹرولیم لیوی کی وصولیوں میں نمایاں اضافہ ریکارڈ کیا گیا ہے۔
وزارتِ خزانہ کے حکام کے مطابق رواں مالی سال پیٹرولیم لیوی سے حاصل ہونے والی آمدن گزشتہ سال کے مقابلے میں 400 ارب روپے زیادہ رہی، جبکہ صرف مارچ 2026 میں گزشتہ برس کے اسی عرصے کے مقابلے میں 52 ارب روپے اضافی وصول کیے گئے۔
اعداد و شمار کے مطابق جولائی سے اپریل کے وسط تک مجموعی طور پر 1234 ارب روپے کی لیوی اکٹھی کی جا چکی ہے، جس میں گزشتہ ڈیڑھ ماہ کے دوران صارفین سے وصول کیے گئے 180 ارب روپے بھی شامل ہیں۔
ماہانہ بنیادوں پر سب سے زیادہ وصولی دسمبر میں 162 ارب 46 کروڑ روپے اور جنوری میں 160 ارب 76 کروڑ روپے رہی، جبکہ دیگر مہینوں میں بھی وصولیوں کا تسلسل برقرار رہا۔
وزارتِ خزانہ رواں مالی سال کے لیے مقررہ 1468 ارب روپے سے زائد کے ٹیکس ہدف کے حصول کے لیے کوشاں ہے۔