پاکستان کی سمندری مصنوعات کے شعبے میں بڑی پیش رفت سامنے آئی ہے جہاں پہلی بار پاکستانی مچھلی اور سی فوڈ کی روس کو برآمدات کی راہ ہموار ہو گئی ہے۔
وزیر بحری امور جنید انوار چوہدری کے مطابق پاکستان کی 16 کمپنیوں کو روس کو مچھلی برآمد کرنے کی باضابطہ اجازت مل گئی ہے جس سے ملکی برآمدات میں نمایاں اضافہ متوقع ہے۔
انہوں نے کہا کہ روسی مارکیٹ میں داخلے کے بعد پاکستان کو یوریشین اکنامک یونین کے دیگر ممالک تک بھی رسائی حاصل ہو سکتی ہے جو برآمدی مواقع کو مزید وسعت دے گی۔
حکام کے مطابق اس پیش رفت کے بعد پاکستان کی سالانہ سی فوڈ برآمدات 500 ملین ڈالر سے بڑھ کر 800 ملین ڈالر تک پہنچنے کا امکان ہے جبکہ ابتدائی مرحلے میں ہی روس کو برآمدات سے تقریباً 300 ملین ڈالر آمدن متوقع ہے۔
وزیر بحری امور کا کہنا ہے کہ پاکستانی گرم پانی کی مچھلیاں عالمی مارکیٹ میں مسابقتی برتری رکھتی ہیں اور نئی منڈیوں تک رسائی سے ملکی معیشت کو تقویت ملے گی۔