پاکستان کرکٹ ٹیم کے سابق کپتان شاہد آفریدی نے سابق افغان فاسٹ بولر شاپور زدران کی تشویشناک طبی حالت پر گہری تشویش کا اظہار کرتے ہوئے ہر ممکن مدد کی پیشکش کی ہے۔
رپورٹس کے مطابق 38 سالہ شاپور زدران کو ایک سنگین طبی پیچیدگی کے باعث اسپتال کے انتہائی نگہداشت وارڈ میں داخل کیا گیا ہے جہاں ان کی حالت نازک بتائی جا رہی ہے۔اہلِ خانہ کی جانب سے بھی سوشل میڈیا پر ان کی صحت سے متعلق اپڈیٹس شیئر کرتے ہوئے مداحوں سے دعاؤں کی اپیل کی گئی ہے۔
اس موقع پر شاہد آفریدی نے سماجی رابطے کی ویب سائٹ ایکس پر اپنے پیغام میں کہا کہ انہوں نے شاپور زدران کے اہلِ خانہ سے بات کی ہے اور ان کی حالت سن کر انہیں شدید افسوس ہوا ہے۔
شاہد آفریدی نے لکھا کہ شاپور زدران ہمیشہ ایک فائٹر رہے ہیں اور انہیں امید ہے کہ وہ اس مشکل وقت کا بھی حوصلے سے مقابلہ کریں گے۔ انہوں نے ان کی جلد صحت یابی کے لیے دعا بھی کی۔
سابق کپتان نے مزید کہا کہ پاکستان اور میں آپ کے ساتھ کھڑے ہیں، اگر کسی بھی مدد کی ضرورت ہوئی تو میں ہمیشہ موجود ہوں۔
واضح رہے کہ شاپور زدران نے افغانستان کی جانب سے 44 ون ڈے میچز میں 43 وکٹیں اور 36 ٹی ٹوئنٹی میچز میں 37 وکٹیں حاصل کی تھیں۔ انہوں نے 2025 میں کرکٹ سے ریٹائرمنٹ کا اعلان کیا تھا۔