راشد خان کا انکشاف: دو ممالک کی شہریت اور کرکٹ کی پیشکش

افغانستان کے معروف لیگ اسپنر راشد خان نے انکشاف کیا ہے کہ انہیں دو ممالک کی جانب سے شہریت اور ان کی قومی ٹیم کی نمائندگی کرنے کی پیشکش کی گئی تھی، تاہم انہوں نے اسے قبول کرنے سے انکار کر دیا۔

بھارتی میڈیا کے مطابق اپنی کتاب Rashid Khan: From Streets to Stardom میں راشد خان نے بتایا کہ 2023 کے آئی پی ایل سیزن کے دوران ایک ٹیم آفیشل نے انہیں بھارتی کرکٹ حکام سے ملاقات کرائی، جہاں انہیں بھارت میں رہنے اور قومی ٹیم کی نمائندگی کی پیشکش کی گئی۔

راشد خان کے مطابق انہیں بتایا گیا کہ افغانستان کی صورتحال کے باعث وہ بھارت میں رہ کر تمام ضروری دستاویزات حاصل کر سکتے ہیں لیکن انہوں نے واضح طور پر انکار کرتے ہوئے کہا کہ وہ صرف افغانستان کی جانب سے ہی کھیلیں گے۔

انہوں نے مزید بتایا کہ انہیں اسی نوعیت کی پیشکش آسٹریلیا سے بھی ہوئی تھی مگر انہوں نے دونوں مواقع مسترد کر دیے۔راشد خان کا کہنا تھا کہ اگر وہ اپنے ملک کی نمائندگی نہیں کرتے تو وہ کرکٹ کھیلنے کا بھی کوئی ارادہ نہیں رکھتے۔