مشرق وسطیٰ میں جاری کشیدگی کے اثرات پاکستان کی معیشت پر بھی ظاہر ہونے لگے ہیں جس کے باعث برآمدات میں نمایاں کمی ریکارڈ کی گئی ہے۔
سرکاری رپورٹ کے مطابق مارچ کے دوران برآمدات میں 14 فیصد کمی دیکھنے میں آئی جبکہ مالی سال کے پہلے 9 ماہ میں مجموعی برآمدات 8 فیصد کمی کے بعد 22 ارب 74 کروڑ ڈالر تک محدود رہیں۔
تفصیلات کے مطابق ملک کے اہم برآمدی شعبے ٹیکسٹائل میں بھی 7.06 فیصد کمی ریکارڈ کی گئی جس کے تحت ماہانہ برآمدات ایک ارب 32 کروڑ 89 لاکھ 75 ہزار ڈالر رہیں۔
رپورٹ میں بتایا گیا ہے کہ پیٹرولیم مصنوعات کی برآمدات میں 63.57 فیصد کی بڑی کمی واقع ہوئی جو کم ہو کر 2 کروڑ 47 لاکھ 52 ہزار ڈالر رہ گئیں۔
اسی طرح جولائی سے مارچ کے دوران غذائی اجناس کی برآمدات 3.80 ارب ڈالر جبکہ ماہانہ بنیادوں پر 40 کروڑ 60 لاکھ 5 ہزار ڈالر ریکارڈ کی گئیں۔
اعداد و شمار کے مطابق پلاسٹک مصنوعات کی برآمدات میں بھی 36.94 فیصد کمی سامنے آئی ہے جو مجموعی تجارتی دباؤ کی نشاندہی کرتی ہے۔
معاشی ماہرین کا کہنا ہے کہ خطے کی کشیدگی اور عالمی منڈیوں میں غیر یقینی صورتحال کے باعث پاکستان کی برآمدی کارکردگی متاثر ہو رہی ہے، اور آئندہ مہینوں میں بھی دباؤ برقرار رہنے کا خدشہ ہے۔