وزارت خزانہ پاکستان نے عالمی مالیاتی منڈیوں سے مزید قرض حاصل کرنے کا فیصلہ کر لیا ہے جس کے تحت آئندہ تین سال کے دوران یورو بانڈز اور سکوک بانڈز کے اجرا کے ذریعے فنڈز اکٹھے کیے جائیں گے۔
حکام کے مطابق اس مقصد کے لیے غیر ملکی بینکوں اور مالیاتی اداروں سے بولیاں طلب کر لی گئی ہیں جبکہ قرض کے حصول کا حتمی وقت عالمی مارکیٹ کے حالات اور شرح سود کو مدنظر رکھتے ہوئے طے کیا جائے گا تاکہ کم لاگت پر فنڈنگ حاصل کی جا سکے۔
دستاویزات کے مطابق حکومت گرین بانڈز، سکوک اور دیگر مالیاتی آلات متعارف کرانے کی تیاری کر رہی ہے جس کا مقصد سرمایہ کاروں کو متنوع مواقع فراہم کرنا اور مالی وسائل میں اضافہ کرنا ہے۔
وزارت خزانہ کا کہنا ہے کہ حکمت عملی کے تحت کم شرح سود پر قرض حاصل کرنے کی کوشش کی جائے گی جبکہ روپے میں ڈالر سے منسلک بانڈز جاری کرنے کی تجویز بھی زیر غور ہے تاکہ زرمبادلہ کے ذخائر کو سہارا دیا جا سکے اور مالی دباؤ کم کیا جا سکے۔