وزیر بحری امور جنید انوار چوہدری نے کورنگی فش ہاربر پر فشریز ریسرچ سینٹر کے قیام کا اعلان کرتے ہوئے کہا ہے کہ پاکستان کے ماہی گیری کے شعبے کو جدید خطوط پر استوار کیا جا رہا ہے۔
انہوں نے بتایا کہ کورنگی فش ہاربر پر 10 ایکڑ کے رقبے پر فشریز اور ایکوا کلچر ریسرچ و تربیتی مرکز قائم کیا جائے گا جہاں ماہی گیری، فارمنگ، پراسیسنگ اور برآمدات تک مکمل سپلائی چین کی سہولیات دستیاب ہوں گی۔
وزیر بحری امور کے مطابق پاکستان کا فشریز سیکٹر اس وقت مجموعی قومی پیداوار (جی ڈی پی) میں 0.5 فیصد سے بھی کم حصہ ڈال رہا ہے، تاہم اس منصوبے کے ذریعے شعبے کی کارکردگی بہتر بنانے اور برآمدات میں اضافہ کرنے کی کوشش کی جائے گی۔
انہوں نے کہا کہ یہ تحقیقی مرکز نہ صرف جدید تربیت فراہم کرے گا بلکہ اس سے ماہی گیری کی پیداوار، معیار اور برآمدی صلاحیت میں بھی نمایاں بہتری متوقع ہے جس سے ملکی آمدنی میں اضافہ ہوگا۔