اسٹیٹ بینک آف پاکستان کی جانب سے جاری کردہ ہفتہ وار ڈیٹا کے مطابق متحدہ عرب امارات اور یورو بانڈ کی ادائیگیوں کے باوجود ملک کے مجموعی زرمبادلہ ذخائر میں استحکام دیکھا گیا ہے۔
سعودی عرب کی جانب سے تین ارب ڈالر کے ڈپازٹس نے ان ذخائر کو سہارا دینے میں اہم کردار ادا کیا ہے۔
گزشتہ ایک ہفتے کے دوران مجموعی زرمبادلہ ذخائر میں 10 کروڑ 40 لاکھ ڈالر کا اضافہ ہوا ہے، جس کے بعد پاکستان کے کل ڈالر ذخائر کی سطح 20 ارب 62 کروڑ 85 لاکھ ڈالر تک پہنچ گئی ہے۔
اسٹیٹ بینک کے جاری کردہ اعداد و شمار کے مطابق اسٹیٹ بینک کے ذخائر 1 کروڑ 80 لاکھ ڈالر کے اضافے کے ساتھ 15 ارب 9 کروڑ 76 لاکھ ڈالر ہوگئے۔
جبکہ تجارتی بینکوں کے ذخائر 8 کروڑ 59 لاکھ ڈالر کے اضافے سے 5 ارب 53 کروڑ ڈالر کی سطح پر آگئے ہیں۔