پاکستان کے آل راؤنڈر محمد نواز نے آئی سی سی ورلڈ ٹی ٹوئنٹی کپ کے دوران ڈوپ ٹیسٹ مثبت آنے پر آئی سی سی اور پی سی بی کو اپنا تحریری جواب جمع کروا دیا ہے۔
محمد نواز کا مؤقف ہے کہ انہوں نے دانستہ طور پر کسی تفریحی منشیات کا استعمال نہیں کیا بلکہ طبیعت ناساز ہونے کی وجہ سے صرف کچھ ادویات لی تھیں۔
محمد نواز اس وقت پی ایس ایل میں ملتان سلطانز کی نمائندگی کر رہے ہیں اور موجودہ قوانین کے تحت انہیں کھیلنے کی اجازت ہے۔ اب آئی سی سی ان کے جواب کا جائزہ لے گی، جس کے بعد ان پر پابندی عائد کرنے یا مزید تحقیقات کرنے کا فیصلہ کیا جائے گا۔
پاکستان کرکٹ کی تاریخ میں اس سے قبل 2006 میں بھی شعیب اختر اور محمد آصف کو چیمپئنز ٹرافی کے دوران ڈوپ ٹیسٹ مثبت آنے پر پابندی کا سامنا کرنا پڑا تھا، تاہم بعد ازاں اپیل پر ان کی پابندیاں ختم کردی گئی تھیں۔