پاکستان کرکٹ بورڈ کے الیکشن کمشنر منصور قادر نے ڈسٹرکٹ کرکٹ ایسوسی ایشنز کے انتخابات کا شیڈول جاری کردیا ہے، جس کے تحت ملک بھر میں انتخابی عمل کا آغاز 11 مئی سے ہوگا۔
راولپنڈی کرکٹ ایسوسی ایشن کے انتخابات 11 مئی بروز ہفتہ کو منعقد ہوں گے، جبکہ چکوال، اٹک اور جہلم کرکٹ ایسوسی ایشنز کے لیے پولنگ 12 مئی بروز اتوار کو ہوگی۔
ڈسٹرکٹ کرکٹ ایسوسی ایشنز کی تین سالہ مدت مکمل ہونے پر کرائے جانے والے ان انتخابات کے لیے امیدوار اپنے کاغذاتِ نامزدگی 30 اپریل بروز جمعرات تک جمع کراسکیں گے۔
پی سی بی نے شفاف اور منصفانہ انتخابات کو یقینی بنانے کے عزم کا اظہار کرتے ہوئے تمام اسٹیک ہولڈرز کو مقررہ شیڈول پر عملدرآمد کی ہدایت کی ہے تاکہ نچلی سطح پر کرکٹ کے ڈھانچے کو مضبوط بنایا جاسکے۔
الیکشن شیڈول کے اعلان کے بعد متعلقہ اضلاع میں انتخابی سرگرمیاں تیز ہونے کا امکان ہے۔