پاکستان میں پیک اوقات کے دوران بجلی کی صورتحال میں بہتری دیکھی گئی ہے جبکہ پن بجلی کی پیداوار میں اضافہ ریکارڈ کیا گیا ہے۔
پاور ڈویژن کے ترجمان کے مطابق حالیہ دنوں میں بجلی کی طلب میں اضافہ ہوا ہے، تاہم پن بجلی کی بہتر پیداوار سے نظام میں استحکام آیا ہے۔ تربیلا ڈیم سے پانی کے اخراج میں اضافے کے باعث رات کے پیک اوقات میں پن بجلی کی پیداوار 5800 میگاواٹ تک پہنچ گئی۔
ترجمان نے بتایا کہ جنوبی علاقوں سے نیشنل گرڈ کو اضافی سپورٹ ملی جس سے مزید 500 میگاواٹ بجلی کی ترسیل ممکن ہوئی جبکہ 100 میگاواٹ اضافی بجلی بھی سسٹم میں شامل کی گئی۔
انہوں نے کہا کہ کچھ علاقوں میں دو گھنٹے لوڈ مینجمنٹ کی گئی جبکہ ایل این جی کی کمی کے باعث بعض پاور پلانٹس بند ہیں۔ تاہم امید ظاہر کی گئی ہے کہ آئندہ دنوں میں صورتحال مزید بہتر ہو جائے گی۔