اسلام آباد کی حالیہ بندش کے باعث قومی ایتھلیٹس کو شدید مشکلات کا سامنا ہے، جس کی وجہ سے پاکستان شوٹنگ ٹیم کے لیے جرمنی کے ویزوں کا حصول کھٹائی میں پڑ گیا ہے۔
ذرائع کے مطابق شوٹنگ ٹیم نے جرمنی کے شہر میونخ میں 24 مئی سے شروع ہونے والے آئی ایس ایس ایف (ISSF) ورلڈ کپ میں شرکت کرنی ہے، جس کے لیے ویزا درخواستیں جمع کروانے کی مقررہ تاریخ 20 اپریل تھی۔
تاہم، وفاقی دارالحکومت کی بندش کے باعث جرمن ایمبیسی نے ایتھلیٹس کو اب 27 مئی کی نئی تاریخ دے دی ہے، جو ورلڈ کپ کے آغاز کے بھی تین دن بعد کی تاریخ ہے۔
اس صورتحال پر قومی شوٹرز، جن میں اسٹار شوٹر کشمالہ طلعت بھی شامل ہیں، نے گہری تشویش کا اظہار کیا ہے۔ کھلاڑیوں نے حکومتِ پاکستان سے اپیل کی ہے کہ ایونٹ میں شرکت یقینی بنانے کے لیے فوری طور پر ویزا مسائل حل کرنے میں ان کی مدد کی جائے تاکہ وہ بروقت جرمنی روانہ ہوسکیں۔