ترنول پھاٹک سے متعلق سوشل میڈیا پر متنازع بیان دینے والے ملزم خرم نذیر کو پولیس نے گرفتار کرلیا۔
حکام کے مطابق ملزم کے خلاف کارِ سرکار میں مداخلت اور نقصِ امن کی دفعات کے تحت مقدمہ درج کرلیا گیا ہے۔
ایف آئی آر میں کہا گیا ہے کہ وفاقی دارالحکومت میں دفعہ 144 نافذ العمل ہے، جس کے باوجود ملزم نے سوشل میڈیا پر ایسی پوسٹ شیئر کی جس میں ترنول پھاٹک کو ”آبنائے ہرمز“ سے تشبیہ دیتے ہوئے اسے بند کرنے کی بات کی گئی تھی۔ پولیس کے مطابق یہ اقدام سرکاری احکامات کی خلاف ورزی کے زمرے میں آتا ہے۔
حکام کا کہنا ہے کہ ملزم کے موبائل فون سے مذکورہ متنازع پوسٹ کی تصدیق کے بعد اسے حراست میں لیا گیا۔ پولیس نے مؤقف اختیار کیا ہے کہ موجودہ حساس سیکیورٹی صورتحال میں عوام کو اکسانا اور اشتعال انگیز مواد پھیلانا قابلِ سزا جرم ہے۔