پاکستان اسٹاک ایکسچینج میں گزشتہ ہفتے مندی کا رجحان غالب رہا جس کے باعث سرمایہ کاروں کو بھاری نقصان اٹھانا پڑا۔
مارکیٹ میں چار دن مسلسل مندی رہی جبکہ آخری کاروباری دن معمولی تیزی بھی دیکھی گئی۔ ہفتے کے دوران ہنڈریڈ انڈیکس میں مجموعی طور پر 3267 پوائنٹس کی کمی ریکارڈ کی گئی۔
سرمایہ کاروں کے مطابق ایک ہفتے میں مجموعی طور پر 372 ارب 69 کروڑ روپے کا نقصان ہوا جبکہ انڈیکس ہفتے کے اختتام پر 170672 پوائنٹس پر بند ہوا۔
مارکیٹ کی بلند ترین سطح 175298 پوائنٹس اور کم ترین سطح 166380 پوائنٹس رہی۔ اس کے باوجود اوسط یومیہ تجارتی حجم میں 16.2 فیصد اضافہ ہوا تاہم تجارتی مالیت میں کمی ریکارڈ کی گئی۔
بروکرز کے مطابق ایران اور امریکا کے درمیان مذاکرات میں تاخیر کے باعث عالمی اور مقامی مالیاتی منڈیوں میں غیر یقینی صورتحال پیدا ہوئی جس کا براہِ راست اثر اسٹاک مارکیٹ پر پڑا۔