ملتان سلطانز کے مالک گوہر شاہ نے کرکٹ کے دیوانوں اور مداحوں کو اہم پیغام میں مخاطب کرتے ہوئے کہا کہ کل قسمت کی مہربانی سے، آپ پاکستان کے میدانوں میں صاحبزادہ فرحان اور سٹیو سمتھ کو ایک ساتھ اننگز کا آغاز کرتے ہوئے لائیو دیکھیں گے۔ پیٹر سڈل کو گلین میکسویل جیسے بلے بازوں کو تیز ترین گیندیں کراتے دیکھنا... سچ میں یہ کسی بھی کرکٹ فین کے لیے ایک خواب کے سچ ہونے جیسا ہے۔
انھوں نے کہا کہ ہم سلطانز کے لیے پلے آف تک کا یہ سفر ہرگز آسان نہیں تھا، ہمیں یہ منزل کٹھن راستوں سے گزر کر ملی ہے۔ اور سچی بات تو یہ ہے کہ ہم جنوبی پنجاب والوں کی تو پوری تاریخ ہی اسی جدوجہد سے عبارت ہے۔ ہم نے ہمیشہ ہر چیز مشکل سے اور کڑی محنت سے ہی حاصل کی ہے۔ بعض اوقات تو ہمیں ایک 'فراموش کردہ خطہ' سمجھ لیا گیا، لیکن ہمارے لوگوں نے کبھی حرفِ شکایت زبان پر نہیں لایا۔
انھوں نے کہا کہ اس سال کے ایچ بی ایل پی ایس ایل (HBL PSL) میں بھی، کسی کا خیال نہیں تھا کہ ہم یہاں تک پہنچ پائیں گے۔ مگر دیکھ لیں، آج ہم پلے آف میں کھڑے ہیں اور قذافی اسٹیڈیم (GSL) کے کھچا کھچ بھرے کراؤڈ کے سامنے اپنا لوہا منوانے کے لیے بالکل تیار ہیں۔
اپنے مداحوں سے میری یہ التجا ہے کہ دل کھول کر دعائیں کریں۔ ہمارے شاندار کھلاڑیوں اور کوچنگ سٹاف کی محنت کے ساتھ ساتھ، آپ کی بھرپور حمایت اور اللہ کی غیبی مدد ہی ہمیں اس کڑے امتحان میں فتح یاب کرسکتی ہے۔
ان کا کہنا تھا کہ ایک فرنچائز کے طور پر آج بھی ہمارا وجود برقرار رہنا بذاتِ خود کسی معجزے سے کم نہیں۔ اسی لیے میرا پختہ یقین ہے کہ اللہ نے ہمیں یہ ایک اور موقع اس لیے دیا ہے کیونکہ ہماری کہانی ابھی ختم نہیں ہوئی، اس سفر کو ابھی بہت آگے تک جانا ہے۔
انھوں نے مزید کہا کہ آئیں، کل کا میچ جیت کر اس شاندار فرنچائز کی تاریخ میں کامیابی کا ایک اور خوبصورت باب رقم کریں، اور اس جادوئی دھرتی کے لوگوں کو اس سیزن میں ایک بار پھر خوشیاں منانے اور مسکرانے کا موقع دیں۔