کراچی کے علاقے صدر پریڈی میں رواں سال کی بڑی نقب زنی کی واردات پیش آئی ہے، جہاں نامعلوم چور جیولرز شاپ سے کروڑوں روپے مالیت کا سونا اور زیورات لے کر فرار ہوگئے۔
ذرائع کے مطابق واقعے کی سی سی ٹی وی فوٹیج بھی سامنے آگئی ہے، جس میں ملزمان کو دکان میں داخل ہوتے اور واردات انجام دیتے دیکھا جاسکتا ہے۔ ابتدائی معلومات کے مطابق چوری کیے گئے سونے اور زیورات کی مجموعی مالیت 20 کروڑ روپے سے زائد بتائی جا رہی ہے۔
ذرائع کا کہنا ہے کہ ملزمان ڈھائی کلو سونا، 60 تولے کے سونے اور چاندی کے زیورات لے اڑے۔ رپورٹ کے مطابق موٹر سائیکل سوار ملزمان تالے کاٹ کر دکان میں داخل ہوئے اور تقریباً ساڑھے 4 بجے واردات شروع کی جو 5 بجے تک جاری رہی۔
پولیس کے مطابق متاثرہ جیولرز نے پریڈی تھانے میں مقدمے کے اندراج کے لیے درخواست جمع کرادی ہے، جبکہ واقعے کی مزید تفتیش جاری ہے۔