اسٹیٹ بینک آف پاکستان کی جانب سے جاری کردہ زرمبادلہ کے ذخائر کے ہفتہ وار ڈیٹا کے مطابق یورو بانڈز کی فروخت سے حاصل ہونے والے قرض کے باعث پاکستان کے مجموعی ڈالر ذخائر ایک بار پھر 21 ارب ڈالر سے تجاوز کرگئے ہیں۔
رپورٹ کے مطابق ایک ہفتے کے دوران اسٹیٹ بینک کے ڈالر ذخائر میں 73 کروڑ ڈالر کا نمایاں اضافہ ریکارڈ کیا گیا ہے، جس کے بعد اسٹیٹ بینک کے پاس موجود ڈالر ڈپازٹس کا مالی حجم 15 ارب 82 کروڑ 79 لاکھ ڈالر تک پہنچ گیا ہے۔
دوسری جانب اسی دورانیے میں کمرشل بینکوں کے ڈالر ذخائر میں 9 کروڑ ڈالر کی کمی دیکھی گئی ہے، جس کے بعد بینکوں کے پاس فارن کرنسی اکاؤنٹس میں 5 ارب 44 کروڑ 11 لاکھ ڈالر موجود ہیں۔
مرکزی بینک کے اعداد و شمار کے مطابق ان تبدیلیوں کے بعد پاکستان کے مجموعی زرمبادلہ کے ذخائر کی سطح 21 ارب 27 کروڑ ڈالر ہوگئی ہے۔