کراچی پورٹ پر بحری تجارت کے شعبے میں ایک اہم پیش رفت سامنے آئی ہے جہاں تاریخ میں پہلی بار مکمل ٹرانس شپمنٹ کارگو جہاز نے برتھنگ کی۔
ایم وی ارلن مختلف اقسام کا کارگو لے کر کراچی بندرگاہ پہنچا جسے پاکستان کے میری ٹائم سیکٹر کے لیے ایک بڑی کامیابی قرار دیا جا رہا ہے۔ کراچی پورٹ کے مطابق یہ اقدام جدید ٹرانس شپمنٹ نظام میں ایک اہم سنگِ میل ہے۔
وفاقی وزیر بحری امور جنید انوار نے کہا کہ ماضی میں کراچی پورٹ پر صرف کنٹینرز کی ٹرانس شپمنٹ ہوتی تھی تاہم اب جنرل کارگو، بلک، بریک بلک اور گاڑیوں کی ہینڈلنگ کے ساتھ نئے تجارتی مواقع پیدا ہو رہے ہیں۔
انہوں نے مزید کہا کہ کراچی پورٹ تیزی سے خطے کے ایک اہم ٹرانس شپمنٹ مرکز میں تبدیل ہو رہی ہے جس سے عالمی تجارتی راستوں کو جوڑنے میں پاکستان کا کردار مزید مضبوط ہوگا۔