لاہور کے علاقے بیگم کوٹ میں ایک شیر کو ہلاک کرنے کے بعد اس کی کھال اتارنے کا واقعہ سامنے آیا ہے، جس کی ویڈیو بھی سوشل میڈیا پر وائرل ہوگئی ہے۔
واقعے کے بعد محکمہ وائلڈ لائف نے فوری نوٹس لیتے ہوئے تحقیقات کے لیے خصوصی کمیٹی تشکیل دے دی ہے۔
حکام کے مطابق کارروائی کے دوران ایک ملزم کو گرفتار کرلیا گیا ہے، جس کے قبضے سے شیر اور ہرن کی کھالیں بھی برآمد ہوئی ہیں۔ ابتدائی معلومات کے مطابق ملزمان غیر قانونی طور پر جانوروں کو مار کر ان کی کھالیں اور حنوط شدہ اشیا تیار کرنے میں ملوث تھے۔
وائلڈ لائف حکام کا کہنا ہے کہ واقعے کی مزید تحقیقات جاری ہیں، جبکہ وائلڈ لائف ایکٹ کے تحت سخت قانونی کارروائی عمل میں لائی جا رہی ہے۔