پاکستان نے مئی کے لیے ایل این جی اسپاٹ خریداری کے تحت دو کارگوز کے حصول کے لیے عالمی سطح پر ٹینڈر جاری کردیے ہیں۔
ذرائع کے مطابق پاکستان ایل این جی لمیٹڈ نے عالمی کمپنیوں سے دو ایل این جی کارگوز کے لیے بڈز طلب کی ہیں، جنہیں جمع کرانے کی آخری تاریخ 7 مئی مقرر کی گئی ہے۔ بڈز اسی روز کھولی بھی جائیں گی۔
پیٹرولیم ڈویژن کے ذرائع کا کہنا ہے کہ پہلے ایل این جی کارگو کی سپلائی 12 سے 14 مئی کے درمیان متوقع ہے، جس سے ملک میں توانائی کی ضروریات پوری کرنے میں مدد ملے گی۔
یاد رہے کہ حال ہی میں وفاقی وزیر برائے توانائی اویس احمد لغاری نے اپنے بیان میں کہا تھا کہ ملک کو ایل این جی گیس کی فراہمی ہوچکی ہے، جس کے بعد بجلی کی لوڈ مینجمنٹ کا خاتمہ ہوگیا ہے۔ انہوں نے کہا کہ گزشتہ چند روز سے عوام کو لوڈ مینجمنٹ کا سامنا تھا، تاہم گیس کی دستیابی کے بعد صورتحال بہتر ہوگئی ہے۔