بنگلا دیش کے خلاف پہلے ٹیسٹ میچ سے قبل پاکستان کرکٹ ٹیم کی مینجمنٹ اور کپتان کی اہم میٹنگ ختم ہوگئی ہے، جس میں پہلے ٹیسٹ کے لیے پلیئنگ الیون کو حتمی شکل دے دی گئی ہے۔
ذرائع کے مطابق پچ کے فاسٹ بالرز کے لیے سازگار ہونے کے پیشِ نظر ٹیم میں تین فاسٹ بالرز کو شامل کیے جانے کا فیصلہ کیا گیا ہے، جن میں شاہین شاہ آفریدی، محمد عباس اور حسن علی کے نام نمایاں ہیں۔
ذرائع کا کہنا ہے کہ نوجوان بیٹر اذان اویس کو اس میچ میں ڈیبیو کروائے جانے کا قوی امکان ہے جبکہ دیگر کھلاڑیوں میں امام الحق، کپتان شان مسعود، بابر اعظم، سلمان علی آغا، سعود شکیل اور وکٹ کیپر بیٹر محمد رضوان کو شامل کیے جانے کی توقع ہے۔
اسپن ڈپارٹمنٹ میں ساجد خان اور نعمان علی کے درمیان مقابلہ تھا، تاہم مینجمنٹ نے نعمان علی پر اعتماد کا اظہار کیا ہے، جس کے باعث پلیئنگ الیون میں ان کی شمولیت کے امکانات زیادہ ہیں۔ اس حوالے سے باقاعدہ اعلان ٹاس کے موقع پر متوقع ہے۔