سیکریٹری اسپورٹس پنجاب فضل الرحمن کی زیر صدارت اجلاس منعقد ہوا جس میں صوبے کے تمام ڈویژنل اسپورٹس افسران نے آن لائن شرکت کی۔ اجلاس کے دوران تمام افسران نے اپنے اپنے ڈویژن میں کھیلی جانے والی گیمز اور جاری ترقیاتی سکیموں کے بارے میں تفصیلی بریفنگ دی۔
سیکریٹری اسپورٹس نے اس موقع پر بتایا کہ وزیراعلیٰ پنجاب کے ویژن کے مطابق صوبے میں کھیلوں کی ترقی کے لیے عالمی معیار کے منصوبوں پر کام کیا جا رہا ہے اور تمام ڈویژنز میں کھیلوں کے بنیادی ڈھانچے کو بہتر بنانے کے لیے بھرپور اقدامات اٹھائے جا رہے ہیں۔
اجلاس میں پنجاب کے مختلف اضلاع میں موجود کھیلوں کی سہولیات کے اعداد و شمار بھی پیش کیے گئے۔
سیکریٹری اسپورٹس فضل الرحمن کے مطابق اس وقت بہاولپور 123 سہولیات کے ساتھ سرِفہرست ہے جبکہ ڈیرہ غازی خان میں 68، سرگودھا میں 59، فیصل آباد میں 57 اور ملتان میں 55 اسپورٹس سہولیات موجود ہیں۔ اسی طرح لاہور میں 48 اور ساہیوال میں 41 مقامات پر کھیلوں کی سہولیات فراہم کی گئی ہیں۔
انہوں نے زور دیا کہ ان تمام ترقیاتی اسکیموں کا مقصد نوجوانوں کو بہترین پلیٹ فارم مہیا کرنا ہے۔