مشرق وسطیٰ میں جاری کشیدگی اور جنگی صورتحال کے اثرات اوورسیز پاکستانیوں کی ترسیلات زر پر بھی پڑنے لگے ہیں جبکہ اپریل کے دوران بیرون ملک مقیم پاکستانیوں کی جانب سے وطن بھیجی جانے والی رقوم میں ماہانہ بنیاد پر کمی ریکارڈ کی گئی ہے۔
اسٹیٹ بینک آف پاکستان کی جانب سے جاری اعداد و شمار کے مطابق اپریل 2026 میں اوورسیز پاکستانیوں نے 3 ارب 50 کروڑ ڈالر وطن بھیجے جبکہ مارچ میں یہ رقم 3 ارب 83 کروڑ ڈالر رہی تھی۔
اسٹیٹ بینک کے مطابق امریکا، برطانیہ، سعودی عرب، متحدہ عرب امارات اور دیگر خلیجی ممالک سے آنے والی ترسیلات زر میں 4 سے 11 فیصد تک کمی ریکارڈ کی گئی۔
اعداد و شمار کے مطابق ماہانہ بنیاد پر ترسیلات زر میں 8 فیصد کمی ہوئی تاہم سالانہ بنیاد پر 11 فیصد اضافہ دیکھنے میں آیا۔
رپورٹ کے مطابق رواں مالی سال کے ابتدائی 10 ماہ میں پاکستان کو مجموعی طور پر 33 ارب 86 کروڑ ڈالر کی ترسیلات موصول ہوئیں جو گزشتہ مالی سال کے اسی عرصے کے مقابلے میں 8 فیصد زیادہ ہیں۔
اپریل میں سب سے زیادہ زرمبادلہ سعودی عرب سے آیا جہاں مقیم پاکستانیوں نے 84 کروڑ 20 لاکھ ڈالر وطن بھیجے، جبکہ یو اے ای سے 73 کروڑ 50 لاکھ، برطانیہ سے 56 کروڑ 40 لاکھ اور امریکا سے 32 کروڑ ڈالر موصول ہوئے۔