پاکستان اور زمبابوے کی ویمن کرکٹ ٹیموں نے کل سے شروع ہونے والی سیریز کی تیاریوں کے سلسلے میں آج نیشنل بینک اسٹیڈیم کراچی میں بھرپور پریکٹس سیشن کیا۔
پاکستانی ویمن ٹیم نے اپنی تیاریاں ٹیم مینٹور وہاب ریاض اور کوچنگ اسٹاف کی زیرِ نگرانی مکمل کیں، جہاں کھلاڑیوں نے مختلف وارم اپ سیشنز میں حصہ لے کر اپنی فٹنس کو جانچا۔
اس تربیتی سیشن کے دوران قومی کھلاڑیوں نے بیٹنگ، بالنگ اور فیلڈنگ کے شعبوں میں اپنی مہارتوں کو نکھارنے کے لیے طویل وقت صرف کیا۔
دوسری جانب زمبابوے کی ٹیم نے بھی اسٹیڈیم میں اپنی مشقیں کیں تاکہ مقامی کنڈیشنز سے ہم آہنگ ہو سکیں۔ دونوں ٹیموں کے درمیان ٹی ٹوئنٹی سیریز کا پہلا میچ کل اسی میدان پر کھیلا جائے گا جس کے لیے کھلاڑیوں نے اپنی حکمت عملی کو حتمی شکل دے دی ہے۔