نوشہرہ کے علاقے میاں عیسیٰ میں راستے پر باڑ لگانے کے تنازع پر دو فریقین کے درمیان ہونے والے مسلح تصادم میں 7 افراد جاں بحق ہوگئے۔
پولیس ذرائع کے مطابق فائرنگ کے اس تبادلے میں ایک فریق کے چار بھائی زاہق، واحد، صالح اور محمد علی مارے گئے، جبکہ دوسرے فریق سے زرغون شاہ اور ان کے دو بیٹے ماجد اور ظہور جاں بحق ہوئے۔
عینی شاہدین کا کہنا ہے کہ چاروں بھائی اپنے گھر کے سامنے باڑ لگا رہے تھے کہ زرغون شاہ اور ان کے بیٹوں کے ساتھ تلخ کلامی ہوئی جس نے دیکھتے ہی دیکھتے خونریز تصادم کی شکل اختیار کرلی۔
واقعے کی اطلاع ملتے ہی پولیس کی بھاری نفری نے موقع پر پہنچ کر تمام لاشوں کو ڈی ایچ کیو اسپتال اور قاضی حسین احمد میڈیکل کمپلیکس منتقل کر دیا۔
پولیس کے مطابق معاملے کی مزید تفتیش جاری ہے تاہم تاحال واقعے کا باقاعدہ مقدمہ درج نہیں کیا جاسکا۔