آئی ایم ایف کا وفد نئے مالی سال کے بجٹ اور معاشی اہداف پر مشاورت کے لیے پاکستان پہنچ گیا ہے جہاں حکومتی معاشی ٹیم کے ساتھ مذاکرات کا آغاز ہو چکا ہے۔
ذرائع کے مطابق وفد 20 مئی تک پاکستان میں قیام کرے گا اس دوران نئے مالی سال کے بجٹ اہداف، ٹیکس اصلاحات، مالیاتی نظم و ضبط، توانائی شعبے میں اصلاحات اور نجکاری پروگرام پر تفصیلی بات چیت ہوگی۔
مذاکرات میں وزارتِ خزانہ، ایف بی آر اور اسٹیٹ بینک کے حکام شریک ہوں گے جبکہ وزارتِ توانائی سمیت دیگر اداروں سے بھی مشاورت کی جائے گی۔
ذرائع کا کہنا ہے کہ آئندہ مالی سال کے لیے 15 ہزار ارب روپے سے زائد ٹیکس ہدف مقرر کرنے کی تجویز زیر غور ہے جبکہ بجٹ خسارہ کم کرنے اور اخراجات میں کمی کے اقدامات پر بھی بات ہوگی۔
دوسری جانب پاکستان کو گزشتہ ہفتے آئی ایم ایف کی منظور کردہ 1.3 ارب ڈالر کی قسط بھی موصول ہو چکی ہے جو زرمبادلہ ذخائر میں شامل کی جا رہی ہے۔