اسٹیٹ بینک نے ملک پر قرضوں سے متعلق تازہ اعدادوشمار جاری کر دیے ہیں جن کے مطابق پاکستان پر مجموعی قرضہ 80 ہزار ارب روپے سے تجاوز کر گیا ہے۔
مرکزی بینک کے مطابق مارچ میں وفاقی حکومت کے مجموعی قرضے 80 ہزار 524 ارب روپے تک پہنچ گئے جو گزشتہ سال کے مقابلے میں 9.3 فیصد اضافہ ظاہر کرتے ہیں جبکہ گزشتہ سال اسی عرصے میں یہ قرضہ 73 ہزار 688 ارب روپے تھا۔
رپورٹ کے مطابق مقامی قرضے 11.7 فیصد اضافے کے ساتھ 57 ہزار 566 ارب روپے تک پہنچ گئے جبکہ بیرونی قرضہ 3.6 فیصد بڑھ کر 22 ہزار 959 ارب روپے ریکارڈ کیا گیا۔
اسٹیٹ بینک کے مطابق ماہانہ بنیاد پر بیرونی قرضوں میں معمولی 1.1 فیصد کمی دیکھی گئی تاہم مقامی قرضے 1.6 فیصد بڑھ گئے جس کے باعث مجموعی قرضوں میں 0.8 فیصد اضافہ ہوا۔ماہرین کے مطابق اس صورتحال میں ہر شہری پر اوسط قرضہ 3.5 لاکھ روپے سے زائد بنتا ہے۔