پاکستان والی بال فیڈریشن کے چیئرمین چوہدری یعقوب نے لاہور میں میڈیا سے گفتگو کرتے ہوئے والی بال کا سالانہ کیلنڈر جاری کردیا ہے۔
انہوں نے اعلان کیا کہ 55 ویں نیشنل والی بال چیمپئن شپ 19 سے 23 مئی تک واہ کینٹ میں منعقد ہوگی جس میں چاروں صوبوں سمیت ڈیپارٹمنٹل ٹیمیں شرکت کریں گی۔ اس کے علاوہ پاکستان 3 سے 10 جولائی تک لاہور میں سینٹرل ایشین مینز والی بال چیمپئن شپ کی میزبانی کرے گا، جس میں افغانستان، بنگلا دیش، سری لنکا، قازقستان، مالدیپ، کرغزستان، نیپال اور بھارت کی ٹیمیں مدعو ہیں۔ بھارت کی شرکت کے حوالے سے انہوں نے واضح کیا کہ بھارتی ٹیم نے باضابطہ تصدیق کردی ہے اور ان کے ویزوں کے لیے متعلقہ اداروں سے بات چیت جاری ہے۔
چوہدری یعقوب نے ملکی تاریخ میں پہلی بار "پاکستان نیشنل لیگ" شروع کرنے کا اعلان بھی کیا، جس کا پہلا ایڈیشن 19 جولائی سے 5 اگست تک لاہور میں کھیلا جائے گا۔ اس لیگ میں 6 فرنچائز ٹیمیں حصہ لیں گی اور ہر ٹیم میں دو انٹرنیشنل کھلاڑی شامل ہوں گے۔ بین الاقوامی مقابلوں کے حوالے سے انہوں نے بتایا کہ پاکستان کی انڈر 18 ٹیم بحرین میں ایشین چیمپئن شپ اور انڈر 17 ٹیم ورلڈ چیمپئن شپ میں شرکت کرے گی، جبکہ سینئر ٹیم ستمبر میں جاپان میں ہونے والے ایشین گیمز 2026 میں ملک کی نمائندگی کرے گی۔
انہوں نے مزید بتایا کہ قومی ٹیم کے لیے ہسپانوی (اسپینش) کوچ کی خدمات حاصل کی جا رہی ہیں اور ویمن والی بال کے فروغ کے لیے اسپانسر شپ کے ذریعے فنڈز کا انتظام کیا جا رہا ہے۔ میڈیا ٹاک کے دوران انہوں نے اس خواہش کا اظہار بھی کیا کہ پاکستان اسپورٹس بورڈ میں کھیلوں سے حقیقی دلچسپی رکھنے والی شخصیت کو ڈی جی تعینات ہونا چاہیے۔