ویتنام کے سفیر فام آن توان نے وفد کے ہمراہ کراچی چیمبر آف کامرس اینڈ انڈسٹری کا دورہ کیا اور تاجر برادری سے ملاقات کی۔ اس موقع پر سفیر نے انکشاف کیا کہ پاکستان اور ویتنام کے درمیان ترجیحی تجارت کے معاہدے (PTA) پر مذاکرات جاری ہیں، جس کے نتیجے میں 100 سے زائد اشیاء پر ٹیرف صفر ہوجائے گا۔ انہوں نے کہا کہ بدلتی ہوئی عالمی تجارتی صورتحال میں کراچی خطے کا ایک ابھرتا ہوا ٹرانس شپمنٹ مرکز بن رہا ہے۔
ویتنامی وفد نے بتایا کہ ویتنام کا مجموعی تجارتی حجم 930 ارب ڈالر تک پہنچ گیا ہے، جس میں برآمدات 475 ارب ڈالر اور درآمدات 455 ارب ڈالر ہیں، تاہم پاکستان اور ویتنام کے درمیان موجودہ تجارتی حجم محض 85 کروڑ ڈالر ہے جو کہ دونوں ممالک کی صلاحیت سے بہت کم ہے۔
کراچی چیمبر کے صدر ریحان حنیف نے کہا کہ دونوں ممالک کے درمیان اقتصادی روابط اور تجارتی تعاون میں مسلسل اضافہ ہو رہا ہے۔ انہوں نے اس بات پر زور دیا کہ باہمی کوششوں سے دو طرفہ تجارتی حجم کو باآسانی دو ارب ڈالر تک بڑھایا جا سکتا ہے۔ ویتنامی سفیر نے دونوں ممالک کے نجی شعبوں کے درمیان براہ راست رابطے بڑھانے کی ضرورت پر بھی زور دیا۔