لاہور چیمبر آف کامرس اینڈ انڈسٹری کے زیر اہتمام پاکستان کی تاریخ کے سب سے بڑے پیڈل ٹورنامنٹ کا باقاعدہ آغاز ہوگیا ہے۔
صوبائی وزیر کھیل ملک فیصل ایوب کھوکھر نے ٹورنامنٹ کا افتتاح کیا جبکہ اس موقع پر صدر لاہور چیمبر فہیم الرحمٰن سہگل اور سینئر نائب صدر تنویر احمد شیخ بھی موجود تھے۔
صوبائی وزیر نے کامیاب ایونٹ کے انعقاد پر لاہور چیمبر کی انتظامیہ کو خراجِ تحسین پیش کرتے ہوئے کہا کہ پیڈل کا کھیل تیزی سے مقبول ہورہا ہے اور ایسے ایونٹس نوجوانوں کو مثبت سرگرمیوں کی طرف راغب کرنے میں مددگار ثابت ہوں گے۔ انہوں نے مزید کہا کہ پنجاب حکومت وزیر اعلیٰ کے وژن کے مطابق نوجوانوں کو کھیلوں کی بہترین سہولیات فراہم کر رہی ہے۔
صدر لاہور چیمبر فہیم الرحمن سہگل نے خطاب کرتے ہوئے کہا کہ کھیلوں کے فروغ سے ہی ایک صحت مند معاشرہ تشکیل پاتا ہے اور یہ ٹورنامنٹ نئے ٹیلنٹ کو سامنے لانے میں اہم کردار ادا کرے گا۔ انہوں نے کاروباری برادری اور نوجوانوں کے لیے اس قسم کے مقابلوں کو خوش آئند قرار دیا۔
اس چار روزہ ٹورنامنٹ میں 150 سے زائد ٹیمیں حصہ لے رہی ہیں۔ افتتاحی تقریب میں ایگزیکٹو کمیٹی کے ممبران، کنوینئر ذیشان ارشد اور بلال حفیظ سمیت دیگر شخصیات نے بھی شرکت کی۔