پاکستان کرکٹ بورڈ کے چیئرمین محسن نقوی کو بھارت میں ہونے والی انٹر نیشنل کرکٹ کونسل بورڈ میٹنگ اور آئی پی ایل کے فائنل کے لیے باضابطہ دعوت نامہ موصول ہو گیا ہے۔
کرکٹ ویب سائٹ کے مطابق آئی سی سی اجلاس دو مراحل میں منعقد ہوں گے۔ چیف ایگزیکٹو کمیٹی کا پہلا اجلاس 21 مئی کو آن لائن ہوگا، جبکہ آئی سی سی بورڈ میٹنگ 30 اور 31 مئی کو بھارتی شہر احمد آبادمیں منعقد کی جائے گی۔
ذرائع کے مطابق اجلاس میں ورلڈ ٹیسٹ چیمپئن شپ کے فارمیٹ میں ممکنہ تبدیلیوں پر غور کیا جائے گا۔ موجودہ نظام کے تحت ہر سیریز میں کم از کم دو ٹیسٹ میچز کھیلنا لازمی ہے۔
اجلاس میں زمبابوے، آئرلینڈ اور افغانستان کو بھی ورلڈ ٹیسٹ چیمپئن شپ میں شامل کرنے کی تجویز زیر غور آنے کا امکان ہے۔ پاکستان کرکٹ بورڈ کی نمائندگی چیئرمین محسن نقوی کریں گے تاہم ان کی بھارت روانگی سے متعلق حتمی فیصلہ وزیرِ اعظم کی منظوری سے مشروط ہوگا۔