پاکستانی ایتھلیٹ وقار احمد نے افریقی جزائر سیشلز میں منعقد ہونے والی سالانہ سیشلز ٹریل رن جیت کر ایک بار پھر پاکستان کا نام روشن کر دیا۔
وقار احمد نے 22 کلومیٹر طویل دشوار گزار ٹریل رن میں شاندار کارکردگی کا مظاہرہ کرتے ہوئے مقررہ فاصلہ 2 گھنٹے 11 منٹ 39 سیکنڈ میں مکمل کیا اور پہلی پوزیشن اپنے نام کی۔ اس کامیابی کے ساتھ انہوں نے اپنے اعزاز کا کامیاب دفاع بھی کیا۔
یہ ٹریل رن دنیا کے مشکل ترین مقابلوں میں شمار کی جاتی ہے، جہاں شرکاء کو پہاڑی راستوں، گھنے جنگلات، ساحلی پٹی اور دشوار گزار ٹریکس سے گزرنا پڑتا ہے۔
وقار احمد کی اس کامیابی کو عالمی سطح پر پاکستانی ایتھلیٹس کی صلاحیتوں کا واضح ثبوت قرار دیا جا رہا ہے جبکہ ان کی مستقل مزاجی، محنت اور اعلیٰ فٹنس کو بھی خوب سراہا جا رہا ہے۔