پاکستان ہاکی ٹیم کے کپتان عماد شکیل بٹ کا کہنا ہے کہ پرو لیگ کے تیسرے فیز کے لیے ٹیم کو بیلجیئم اور چوتھے فیز کے لیے انگلینڈ جانا ہے، جس کے لیے تیاریاں شروع کردی گئی ہیں۔
انہوں نے بتایا کہ لیگ کھیلنے والے تمام کھلاڑیوں نے کیمپ جوائن کرلیا ہے جبکہ رانا وحید اور ابوبکر محمود آج پاکستان پہنچ کر کل سے کیمپ کا حصہ بنیں گے۔ کپتان کے مطابق، کوچ منظور حسن سنیئر کی زیر نگرانی پرو لیگ کے گزشتہ آٹھ میچوں کی غلطیوں کو دور کرنے، اٹیک، شارٹ کارنر اور فٹنس کو بہتر بنانے پر کام جاری ہے اور امید ہے کہ بیلجیئم فیز میں ٹیم پہلے سے زیادہ بہتر کارکردگی دکھائے گی۔
عماد شکیل بٹ نے مزید کہا کہ پرو لیگ میں بڑی ٹیموں کے خلاف کھیل کر بہت کچھ سیکھنے کو ملا ہے، انہوں نے بھارت کو ایک مضبوط حریف قرار دیتے ہوئے کہا کہ بھارت کی طرح پاکستان کی ٹیم بھی اچھی ہے اور ان کی ٹیم بھارت کو شکست دینے کی پوری کوشش کرے گی۔