ایس ای سی پی نے نان بینکنگ فنانشل سیکٹر میں ڈیجیٹلائزیشن اور اصلاحات کے لیے اہم اقدامات کرتے ہوئے ملک کا پہلا ڈیجیٹل جنرل تکافل لائسنس جاری کر دیا ہے۔
ایس ای سی پی کے مطابق ویلتھ برج مینجمنٹ کو پاکستان کا پہلا ڈیجیٹل انویسٹمنٹ ایڈوائزری لائسنس جاری کیا گیا جبکہ پنجاب لائف انشورنس لمیٹڈ کو پہلی صوبائی سرکاری لائف انشورنس کمپنی کا لائسنس دیا گیا ہے۔
ترجمان ایس ای سی پی کے مطابق یہ اقدامات لائسنسنگ اصلاحات، غیر ملکی سرمایہ کاری اور ڈیجیٹل فنانشل سروسز کے فروغ کی جانب اہم پیش رفت قرار دی جا رہی ہیں۔
ادارے کے مطابق گزشتہ تین ماہ کے دوران لائسنسنگ ڈیپارٹمنٹ نے 510 درخواستیں نمٹائیں جبکہ 84 نئے لائسنس جاری کیے گئے۔ اسی عرصے میں زیر التواء درخواستوں کی تعداد 1143 سے کم ہو کر 633 رہ گئی ہے۔
ایس ای سی پی نے غیر ملکی درخواست گزاروں کے لیے پیشگی سکیورٹی کلیئرنس کی شرط ختم کرنے کا بھی فیصلہ کیا ہے جبکہ سیکشن 42 کمپنیوں کے لیے دستاویزی تقاضے آسان بنانے پر کام جاری ہے۔
ڈاکٹر کبیر سدھو کے مطابق ان اصلاحات کا مقصد سرمایہ کاری کے ماحول کو بہتر بنانا اور مالیاتی شعبے کو جدید تقاضوں سے ہم آہنگ کرنا ہے۔