بنگلا دیش نے بدھ کو سلہٹ میں کھیلے گئے دوسرے ٹیسٹ میچ میں پاکستان کے خلاف تاریخی فتح حاصل کرلی۔ انہوں نے یہ میچ 78 رنز سے جیت کر سیریز میں 2-0 سے کلین سویپ کر دیا۔
پاکستان نے آج صبح دوسری نئی گیند کے صرف 11.2 اوورز میں اپنی آخری تین وکٹیں گنوا دیں اور سیریز برابر کرنے کے لیے درکار 437 رنز کے تعاقب میں پوری ٹیم 358 رنز بنا کر آؤٹ ہوگئی۔
محمد رضوان 94 رنز بنا کر شریف الاسلام کی گیند پر گلی میں کیچ آؤٹ ہوئے، جس سے پاکستان کی مزاحمت کا خاتمہ ہو گیا، جبکہ گزشتہ روز کے دوسرے ناٹ آؤٹ بلے باز ساجد خان کو بائیں ہاتھ کے اسپنر تاج الاسلام نے 28 رنز پر آؤٹ کیا۔ تاج الاسلام نے 120 رنز دے کر 6 وکٹیں حاصل کیں۔
یہ دوسرا موقع ہے جب بنگلا دیش نے پاکستان کے خلاف دو ٹیسٹ میچوں کی سیریز 2-0 سے جیتی ہے، اس سے قبل انہوں نے 2024 میں پاکستان کے ہوم گراؤنڈ پر بھی یہی کارنامہ انجام دیا تھا۔
یہ بھی پہلی بار ہوا ہے کہ پاکستان کو کسی ٹیم کے ہاتھوں لگاتار ٹیسٹ سیریز میں کلین سویپ (مکمل شکست) کا سامنا کرنا پڑا ہے۔
آخری دن کا کھیل آج صبح بارش کی وجہ سے تاخیر سے شروع ہوا، اور جب کھیل کا آغاز ہوا تو آسمان پر بادل چھائے ہوئے تھے اور فلڈ لائٹس آن تھیں، تاہم رضوان اور ساجد نے 6 رنز فی اوور کی اوسط سے جارحانہ بلے بازی کی۔
اس نتیجے کا مطلب یہ ہے کہ پاکستان اب تک شان مسعود کی کپتانی میں کھیلے گئے 16 ٹیسٹ میچوں میں سے 12 ہار چکا ہے، جنہوں نے دوسری اننگز میں 71 رنز بنائے تھے۔