پاکستان ہاکی ٹیم کے چیف سلیکٹر سمیع اللہ نے کہا ہے کہ انہوں نے اب تک تین تربیتی سیشنز کیے ہیں جن میں بنیادی طور پر گول کیپرز کی فٹنس اور کارکردگی کا جائزہ لیا گیا ہے۔ ان کا مقصد ٹیم میں بڑی تبدیلیاں کرنے کے بجائے پرانے کھلاڑیوں کا تسلسل برقرار رکھنا ہے۔
میڈیا سے گفتگو کرتے ہوئے چیف سلیکٹر نے بتایا کہ دورے کے لیے بنیادی طور پر 20 کھلاڑیوں کی سلیکشن کی جائے گی، تاہم مجموعی طور پر 24 سے 25 کھلاڑیوں کا انتخاب کیا جا رہا ہے جن میں سے 4 سے 5 کھلاڑیوں کو اسٹینڈ بائی پر رکھا جائے گا۔
ان کا کہنا تھا کہ منتخب کھلاڑیوں کی فہرست پاکستان ہاکی فیڈریشن (پی ایچ ایف) کے صدر محی الدین وانی کو بھجوائی جائے گی اور اس پر حتمی فیصلہ وہی کریں گے۔ سمیع اللہ نے کھلاڑیوں کی فٹنس پر اطمینان کا اظہار کرتے ہوئے کہا کہ وہ مکمل فٹ ہیں، البتہ ان میں صرف کھیل کے دوران کوآرڈی نیشن کی کچھ کمی نظر آئی ہے جسے دور کر لیا جائے گا۔
انہوں نے واضح کیا کہ ٹیم میں کوئی بڑی اکھڑ پچھاڑ نہیں کی جا رہی، بلکہ پرانے کھلاڑیوں کو زیادہ چھیڑے بغیر چند نئے اور اچھے کھلاڑیوں کو شامل کر کے انہیں بہتر انداز میں استعمال کیا جائے گا۔ اس سلسلے میں انہوں نے کوچ منظور الحسن کو ہدایت کی ہے کہ وہ ہر میچ میں کھلاڑیوں کی انفرادی پرفارمنس کی رپورٹ سلیکشن کمیٹی کو بھیجیں تاکہ سینیئر کھلاڑیوں کی کارکردگی کو بھی مسلسل جانچا جا سکے۔
انہوں نے عزم ظاہر کیا کہ پرو لیگ میں پاکستان ٹیم کی جانب سے سخت مقابلہ دیکھنے کو ملے گا، تاہم ہمارا اصل اور بنیادی فوکس ایشین گیمز پر ہے۔