پاکستان کرکٹ بورڈ کے سینئر اسکورر نجم السعید بقضائے الٰہی انتقال کرگئے۔ مرحوم ملک کے سینئر ترین اسکوررز میں شمار ہوتے تھے اور رواں سال ریٹائرمنٹ بھی متوقع تھی۔
نجم السعید نے ملکی اور بین الاقوامی کرکٹ کے متعدد ریکارڈز اپنی اسکورنگ کے ذریعے محفوظ کیے اور کرکٹ کی تاریخ میں اہم خدمات انجام دیں۔ مرحوم کی نماز جنازہ بعد نماز عصر سمن آباد میں ادا کی جائے گی۔
دوسری جانب چیئرمین پاکستان کرکٹ بورڈ محسن نقوی نے نجم السعید کے انتقال پر گہرے دکھ اور افسوس کا اظہار کیا ہے۔ انہوں نے سوگوار خاندان سے دلی ہمدردی اور تعزیت کا اظہار کرتے ہوئے کہا کہ مرحوم کی کرکٹ اسکورنگ کے شعبے میں خدمات ہمیشہ یاد رکھی جائیں گی۔