ایف آئی ایچ ورلڈ کپ سے قبل پاکستانی ہاکی ٹیم کے کھلاڑیوں کے مالیاتی مسائل ایک بار پھر سامنے آ گئے ہیں جس کے باعث ٹیم کی تیاریوں پر سوالات اٹھنے لگے ہیں۔
ذرائع کے مطابق پاکستان ہاکی فیڈریشن کے عبوری سیٹ اپ نے اعلان کیا ہے کہ قومی ٹیم کے کھلاڑیوں اور آفیشلز کو غیر ملکی دوروں اور ٹورنامنٹس کے دوران 110 ڈالر روزانہ الاؤنس دیا جائے گا تاہم اس اعلان کے باوجود کھلاڑیوں کی شکایات میں اضافہ ہو گیا ہے۔
کھلاڑیوں کا کہنا ہے کہ ٹریننگ کیمپ کے دوران ان کا الاؤنس 3,000 روپے (تقریباً 11 ڈالر) سے کم کر کے 1,000 روپے (تقریباً 3.5 ڈالر) کر دیا گیا ہے جس پر ٹیم میں شدید بے چینی پائی جا رہی ہے۔
پی ایچ ایف سے قریبی ذرائع کے مطابق سینیئر کھلاڑیوں نے فیڈریشن اور کیمپ مینجمنٹ سے واضح مؤقف طلب کیا ہے کہ انہیں کیمپ کے دوران کتنی رقم دی جائے گی، تاہم ابھی تک کوئی حتمی وضاحت سامنے نہیں آ سکی۔
ذرائع کا یہ بھی کہنا ہے کہ عبوری سیٹ اپ کو یہ سوالات ناگوار گزرے ہیں جبکہ اگلے ماہ بیلجیم اور انگلینڈ میں ہونے والے ایف آئی ایچ لیگ کے مرحلے کے لیے 20 رکنی اسکواڈ کا اعلان تو کر دیا گیا ہے لیکن کپتان کا نام تاحال ظاہر نہیں کیا گیا۔
سینیئر کھلاڑی شکیل بٹ کے قیادت کے حوالے سے بھی ابہام برقرار ہے جنہوں نے گزشتہ سال کے آغاز سے ٹیم کی کپتانی سنبھال رکھی تھی مگر اس بار ان کا نام فہرست میں شامل نہ ہونا حیران کن قرار دیا جا رہا ہے۔
ایک کھلاڑی نے نام ظاہر نہ کرنے کی شرط پر کہا کہ 110 ڈالر روزانہ الاؤنس کے اعلان پر یقین تب ہوگا جب یہ رقم واقعی ادا کی جائے گی کیونکہ ماضی میں بھی ایسے وعدے کیے گئے مگر عملی طور پر ان پر عمل نہیں ہوا۔
ایک اور کھلاڑی نے کہا کہ موجودہ صورتحال میں کیمپ کے دوران 1,000 روپے روزانہ الاؤنس انتہائی کم ہے اور قومی کھلاڑیوں کے ساتھ ناانصافی کے مترادف ہے۔
پاکستان ٹیم کا اگلا بڑا چیلنج جون میں پرو لیگ کے میچز ہیں، جس کے بعد جولائی اور اگست میں ورلڈ کپ میں شرکت متوقع ہے جہاں ٹیم کو بیلجیم، نیدرلینڈز، اسپین، انگلینڈ اور روایتی حریف بھارت جیسے مضبوط حریفوں کا سامنا ہوگا۔