پاکستان کی ثالثی میں ایران اور امریکا کے درمیان ممکنہ جنگ بندی کی بڑھتی توقعات کے باعث پاکستان اسٹاک ایکسچینج میں گزشتہ کاروباری ہفتے مجموعی طور پر مثبت رجحان دیکھا گیا۔
ہفتہ وار رپورٹ کے مطابق سرمایہ کاروں کو اس ہفتے مجموعی طور پر 226 ارب 87 کروڑ روپے کا منافع حاصل ہوا جبکہ ہنڈریڈ انڈیکس میں 2 ہزار 248 پوائنٹس کا اضافہ ریکارڈ کیا گیا۔
مارکیٹ میں 1.36 فیصد نمو کے بعد ہنڈریڈ انڈیکس ہفتے کے اختتام پر 1 لاکھ 67 ہزار 844 پوائنٹس پر بند ہوا۔
رپورٹ کے مطابق کاروباری ہفتے کے دوران انڈیکس 8 ہزار پوائنٹس کے وسیع بینڈ میں ٹریڈ کرتا رہا جبکہ ہفتہ وار بلند ترین سطح 169,624 پوائنٹس اور کم ترین سطح 161,613 پوائنٹس ریکارڈ کی گئی۔
مارکیٹ کے اوسط یومیہ تجارتی حجم میں 39.9 فیصد کمی دیکھی گئی اور یہ 49 کروڑ 80 لاکھ شیئرز رہا، جبکہ اوسط یومیہ تجارتی مالیت بھی 5.3 فیصد کم ہو کر 8 کروڑ 63 لاکھ ڈالر رہی۔
دوسری جانب مارکیٹ کیپیٹلائزیشن میں ہفتہ وار 227 ارب روپے کا اضافہ ہوا، جس کے بعد مجموعی مالیت بڑھ کر 18 ہزار 616 ارب روپے تک پہنچ گئی۔