امریکا سے تعلق رکھنے والے سیریل گنیز ورلڈ ریکارڈ ہولڈر ڈیوڈ رش نے ایک اور انوکھا کارنامہ انجام دیتے ہوئے صرف ایک منٹ میں 32 ٹی شرٹس پہن کر نیا ریکارڈ قائم کردیا ہے۔
ریاست آئیڈاہو کے رہائشی ڈیوڈ رش اس سے قبل بھی ٹی شرٹس سے متعلق متعدد حیران کن ریکارڈز اپنے نام کر چکے ہیں، جن میں 30 سیکنڈ کے اندر زیادہ سے زیادہ ٹی شرٹس پہننے اور تیزی سے 10 ٹی شرٹس پہننے جیسے کارنامے شامل ہیں۔
اس بار انہوں نے “ایک منٹ میں سب سے زیادہ ٹی شرٹس پہننے” کا چیلنج قبول کیا اور ایک مرتبہ پھر اپنی صلاحیتوں کا لوہا منوا لیا۔
ڈیوڈ رش کا کہنا ہے کہ یہ بظاہر ایک آسان کام لگتا ہے، لیکن حقیقت میں یہ انتہائی مشکل اور جسمانی طور پر تھکا دینے والا چیلنج ہے۔ ان کے مطابق جیسے جیسے ٹی شرٹس کی تہیں بڑھتی جاتی ہیں، جسم کی حرکت محدود ہونا شروع ہو جاتی ہے اور ہر نئی شرٹ پہننا مزید مشکل ہوتا جاتا ہے۔
انہوں نے اپنی ویب سائٹ پر بتایا کہ چند شرٹس کے بعد صورتحال یہ ہو جاتی ہے کہ صرف وقت کے خلاف نہیں بلکہ کپڑوں کے ساتھ بھی جدوجہد کرنا پڑتی ہے۔ بازوؤں کی حرکت محدود ہو جاتی ہے اور جسم ایسا محسوس ہوتا ہے جیسے کسی سخت گرفت میں آ گیا ہو۔