ایران اور امریکا کے درمیان ممکنہ ڈیل کی خبروں کے بعد پاکستان اسٹاک ایکسچینج میں زبردست تیزی دیکھنے میں آئی اور کاروبار مثبت رجحان کے ساتھ اختتام پذیر ہوا۔
پاکستان اسٹاک ایکسچینج میں کاروبار کا آغاز ہی 2900 پوائنٹس کی تیزی سے ہوا، جبکہ دورانِ ٹریڈنگ انڈیکس میں 4000 سے زائد پوائنٹس کا اضافہ بھی ریکارڈ کیا گیا۔مارکیٹ میں تیزی کے باعث ایک لاکھ 68 ہزار، 69 ہزار، 70 ہزار اور 71 ہزار پوائنٹس کی اہم حدیں بحال ہو گئیں۔
کاروباری سیشن کے اختتام پر ہنڈریڈ انڈیکس 3881 پوائنٹس اضافے کے بعد 171725 پوائنٹس پر بند ہوا۔
اسٹاک تجزیہ کاروں کے مطابق مالیاتی ادارے اور بڑے سرمایہ کار ایک بار پھر مارکیٹ میں متحرک نظر آئے جس سے سرمایہ کاروں کے اعتماد میں اضافہ ہوا۔
مارکیٹ میں فرٹیلائزر، بینکنگ، سیمنٹ، انرجی اور آئل اینڈ گیس سیکٹرز کے شیئرز میں نمایاں خریداری دیکھی گئی۔