اسٹیٹ بینک آف پاکستان نے اے ٹی ایم فراڈ کی روک تھام کے لیے تمام کمرشل بینکوں کو سیکیورٹی نظام مزید مؤثر اور سخت بنانے کی ہدایت جاری کردی ہے۔
اسٹیٹ بینک کی جانب سے جاری ہدایات کے مطابق بینکوں کو اے ٹی ایم بوتھس پر نصب سی سی ٹی وی کیمروں کو 24 گھنٹے فعال رکھنے اور کسی بھی مشکوک سرگرمی کی صورت میں صارفین کو فوری آگاہ کرنے کا پابند بنایا گیا ہے۔
مرکزی بینک نے صارفین کے تحفظ کے لیے عالمی معیار کے چِپ اینڈ پن کارڈز کے اجرا کی بھی ہدایت کی ہے، جبکہ اے ٹی ایم ٹرانزیکشنز میں فراڈ کی روک تھام کے لیے جدید ٹیکنالوجی کے استعمال اور مشینوں میں ضروری حفاظتی آلات کی تنصیب یقینی بنانے پر زور دیا گیا ہے۔
ہدایت نامے میں کہا گیا ہے کہ اے ٹی ایم سسٹمز اور متعلقہ سافٹ ویئرز کو باقاعدگی سے اپڈیٹ کیا جائے اور بینکنگ نیٹ ورکس کے درمیان محفوظ اور خفیہ رابطہ کاری کو یقینی بنایا جائے تاکہ صارفین کا ڈیٹا محفوظ رہے۔
اسٹیٹ بینک کے مطابق اگر کوئی صارف اے ٹی ایم فراڈ کا شکار ہو تو وہ فوری طور پر متعلقہ بینک کی ہیلپ لائن سے رابطہ کرے، جبکہ شکایت کے بروقت ازالے کی صورت میں صارفین اسٹیٹ بینک کے آن لائن شکایتی پورٹل سے بھی رجوع کرسکتے ہیں۔