پیٹرولیم مصنوعات کی قیمتوں میں حالیہ کمی کے باوجود پیٹرول اور ہائی اسپیڈ ڈیزل کی قیمتیں اب بھی بلند سطح پر برقرار ہیں، جبکہ شہریوں پر پیٹرولیم لیوی کا اضافی بوجھ بھی بدستور قائم ہے۔
اعداد و شمار کے مطابق گزشتہ 36 دنوں کے دوران حکومت نے پیٹرول اور ہائی اسپیڈ ڈیزل کی قیمتوں میں تین مرتبہ اضافہ اور تین مرتبہ کمی کی۔ تاہم ان رد و بدل کے باوجود پیٹرولیم مصنوعات کی موجودہ قیمتیں پانچ ہفتے قبل کے مقابلے میں نمایاں طور پر زیادہ ہیں۔
رپورٹ کے مطابق ہائی اسپیڈ ڈیزل کی قیمت میں 36 روز کے دوران مجموعی طور پر 61 روپے 16 پیسے فی لیٹر اضافہ کیا گیا، جس کے بعد مختلف مراحل میں 33 روپے 80 پیسے فی لیٹر کمی کی گئی۔ اس کمی کے باوجود ڈیزل کی قیمت میں 27 روپے 36 پیسے فی لیٹر کا خالص اضافہ اب بھی برقرار ہے۔
ماہرین کا کہنا ہے کہ قیمتوں میں حالیہ کمی سے عوام کو جزوی ریلیف ضرور ملا ہے، تاہم پیٹرولیم لیوی اور مجموعی اضافے کے باعث ایندھن کی قیمتیں اب بھی صارفین کے لیے بوجھ بنی ہوئی ہیں۔