کارپوریٹ سیکٹر کے لیے سیکیورٹیز اینڈ ایکسچینج کمیشن آف پاکستان (SECP) نے اہم اقدام اٹھاتے ہوئے کمپنیوں کے لیے 'سرٹیفکیٹ آف کمپلائنس' فریم ورک متعارف کرادیا ہے، جس کا نوٹیفکیشن بھی جاری کردیا گیا ہے۔
اس اقدام کے بعد اب ہر شہری رجسٹرڈ کمپنیز کی اہم معلومات جان سکے گا۔ ایس ای سی پی کے مطابق یہ سرٹیفکیٹ کمپنی کی رجسٹریشن، فعالیت اور ریگولیٹری کمپلائنس کی تصدیق کرے گا، جو پاکستانی کمپنیوں کی بین الاقوامی شراکت داری کے لیے انتہائی فائدہ مند ثابت ہوگا۔
کمپنیز کو ریگولیٹری کمپلائنس کا یہ باقاعدہ سرٹیفکیٹ حاصل کرنے کے لیے ایس ای سی پی کے رجسٹرار آف کمپنیز کو درخواست جمع کروانی ہوگی۔ تاہم، غیر فعال، کسی بھی قسم کی تحقیقات کا سامنا کرنے والی یا نامکمل ریکارڈ رکھنے والی کمپنیوں کو یہ سرٹیفکیٹ جاری نہیں کیا جائے گا۔ اس کے علاوہ کمپنی کی طرف سے ریٹرن فائلنگز مکمل نہ ہونے کی صورت میں بھی کمپلائنس سرٹیفکیٹ جاری نہیں ہوگا۔