مشرق وسطیٰ میں جاری کشیدگی کے توانائی کی عالمی منڈیوں پر اثرات برقرار ہیں، جس کے باعث پاکستان میں مائع پیٹرولیم گیس (ایل پی جی) کی قیمت میں بھی اضافہ کردیا گیا ہے۔
آئل اینڈ گیس ریگولیٹری اتھارٹی (اوگرا) کی جانب سے جاری نوٹیفکیشن کے مطابق ایل پی جی کی قیمت میں 4 روپے 95 پیسے فی کلوگرام اضافہ کیا گیا ہے، جس کے نتیجے میں 11.8 کلوگرام کے گھریلو سلنڈر کی قیمت 58 روپے 51 پیسے بڑھ گئی ہے۔
اوگرا کے مطابق جون کے لیے گھریلو ایل پی جی سلنڈر کی نئی قیمت 3 ہزار 643 روپے 41 پیسے مقرر کی گئی ہے، جبکہ ایل پی جی کی فی کلو قیمت 308 روپے 76 پیسے ہو گئی ہے۔
نوٹیفکیشن کے مطابق نئی قیمتوں کا اطلاق فوری طور پر کر دیا گیا ہے اور صارفین آج سے ایل پی جی نئی قیمتوں پر خرید سکیں گے۔
توانائی کے شعبے سے وابستہ ماہرین کے مطابق عالمی سطح پر جاری جغرافیائی اور سیاسی کشیدگی کے باعث توانائی مصنوعات کی قیمتوں میں اتار چڑھاؤ کا سلسلہ برقرار رہ سکتا ہے۔