قومی ٹیم کو ہر کنڈیشنز کے لیے بھرپور طریقے سے تیار کروائیں گے، مائیک ہیسن

پاکستان کرکٹ ٹیم کے ہیڈ کوچ مائیک ہیسن کا کہنا ہے کہ وہ ان باتوں سے باخبر ہیں کہ آسٹریلیا کے خلاف سیریز میں سلو پچز بنائی جا رہی ہیں اور یہ بھی سننے میں آ رہا ہے کہ ورلڈ کپ کی تیاری کو مدنظر رکھتے ہوئے پچز معیاری نہیں ہیں۔

انہوں نے واضح کیا کہ اگلا ورلڈ کپ جنوبی افریقہ، زمبابوے اور نمیبیا میں کھیلا جانا ہے، جہاں کچھ مقامات پر پچز اسپنرز کے لیے سازگار ہیں۔ ان کا کہنا تھا کہ جنوبی افریقہ کی پچز کے بارے میں یہ عام تاثر درست نہیں ہے کہ وہ صرف فاسٹ بولرز کے لیے سازگار ہوتی ہیں اور ان میں باؤنس ہوتا ہے، بلکہ وہاں کچھ پچز مشکل ہیں اور مختلف مقامات پر کنڈیشنز بھی مختلف ہوتی ہیں۔

مائیک ہیسن نے ماضی کا حوالہ دیتے ہوئے کہا کہ پاکستان کی جنوبی افریقہ میں ہونے والی آخری ون ڈے سیریز میں بھی اسپنرز نے اہم کردار ادا کیا تھا۔ انہوں نے اس عزم کا اظہار کیا کہ وہ اس بات کا یقین دلاتے ہیں کہ اگلے 16 مہینوں میں قومی ٹیم کو ہر قسم کی کنڈیشنز کے لیے بھرپور طریقے سے تیار کروائیں گے۔