پاکستان اسٹاک ایکسچینج میں گزشتہ روز کی شدید مندی کے بعد آج کاروبار کا اختتام مثبت زون میں ہوا اور مارکیٹ نے 171 ہزار پوائنٹس کی نفسیاتی حد دوبارہ حاصل کر لی۔
کاروباری ہفتے کے دوران مارکیٹ میں اتار چڑھاؤ دیکھنے میں آیا جہاں ایک موقع پر ہنڈرڈ انڈیکس میں 1250 پوائنٹس تک تیزی ریکارڈ کی گئی جبکہ دورانِ ٹریڈنگ 350 پوائنٹس کی کمی بھی دیکھی گئی۔
کاروبار کے اختتام پر 100 انڈیکس 421 پوائنٹس اضافے کے ساتھ 171,021 پوائنٹس پر بند ہوا۔ گزشتہ روز مارکیٹ میں 3,500 پوائنٹس سے زائد کی نمایاں مندی دیکھی گئی تھی۔
اسٹاک تجزیہ کاروں کے مطابق سرمایہ کار ایران اور امریکا کے درمیان ممکنہ پیش رفت اور آئندہ وفاقی بجٹ سے متعلق مثبت خبروں کے منتظر ہیں، جس کے باعث مارکیٹ میں محتاط امید کا رجحان پایا جاتا ہے۔
بروکرز کا کہنا ہے کہ بینکنگ اور فرٹیلائزر سیکٹر کے شیئرز میں خریداری کی لہر نے مارکیٹ کو دوبارہ سنبھالا دیا اور شدید مندی کے اثرات کو کم کرنے میں اہم کردار ادا کیا۔