کوئٹہ میں خاتون ڈاکٹر پر تیزاب پھینکے جانے کے واقعے کے بعد انہیں فوری طور پر کراچی کے نجی اسپتال منتقل کردیا گیا ہے، جہاں ان کا علاج جاری ہے۔
اسپتال ذرائع کے مطابق متاثرہ ڈاکٹر کی حالت خطرے سے باہر ہے، تاہم ابتدائی طبی امداد اور مختلف طبی ٹیسٹوں کے بعد انہیں پلاسٹک سرجری وارڈ میں داخل کر دیا گیا ہے۔ ذرائع نے بتایا کہ ڈاکٹر تقریباً 13 فیصد جھلس چکی ہیں، جبکہ ان کی آنکھیں بھی متاثر ہوئی ہیں، تاہم خوش قسمتی سے بینائی محفوظ ہے۔
اسپتال انتظامیہ کا کہنا ہے کہ ڈاکٹر ماہ نور کی حالت مسلسل نگرانی میں ہے اور ان کے علاج کے لیے ماہر ڈاکٹروں پر مشتمل ٹیم خدمات انجام دے رہی ہے۔
دوسری جانب واقعے کے خلاف کوئٹہ میں ینگ ڈاکٹرز ایسوسی ایشن نے احتجاج کرتے ہوئے او پی ڈیز اور وارڈز میں ڈیوٹیوں کا بائیکاٹ کردیا ہے۔